बालकाचे मन चंचल व जिज्ञासू असल्यामुळे ते कोणतीही एकच कृती दीर्घकाळ करू शकत नाही. वयानुसार बालकाच्या क्रिया बदलत जातात जसजसे बालक मोठे होते तसे ते वेगवेगळ्या कृती करायला शिकते. केलेल्या प्रत्येक कृतीतून बालक नवनवीन कौशल्ये शिकत असते व अनुभव ही घेत असते. यामुळे बालकाच्या कल्पनाशक्तीचा विकास होण्यास मदत होते. याकरिता पालकांनी बालकावर आपले मत न लादता बालकाच्या इच्छेनुसार कृती करण्याची संधी उपलब्ध करून द्यावी. जेणेकरून बालक स्वतंत्रपणे विचार करून किंवा कल्पना करून नवीन कृती अस्तित्वात आणेल. याकरिता पालकांनी थोडा संयम ठेवून बालक करीत असलेल्या कृतीचे निरीक्षण करावे व गरज असल्यासच मदत करावी. कुटुंबातील एक सदस्य म्हणून बालकाला कौटुंबिक चर्चेमध्ये सहभागी केल्यास, त्याच्या आवड, निवड व मताचा आदर केल्यामुळे आपण स्वतंत्र व्यक्ती असल्याची भावना विकसित होण्यास मदत होते.