पार्श्वभूमी

अन्न ही मानवाची प्राथमिक गरज आहे, त्यामुळे आहारात घेतलेले अन्न पोषणदृष्ट्या समतोल हवे. शरीरपोषण व संवर्धन यासाठी कर्बोदके, प्रथिने, स्निग्ध पदार्थ, पाणी, क्षार, जीवनसत्व व खनिज द्रव्ये यांचा आवश्यक तेवढा पुरवठा व त्याचे योग्य प्रमाण आपल्या आहारात पाहिजे. कोणत्याही एकाच खाद्यपदार्थात हे सर्व घटक योग्य प्रमाणात मिळणे शक्य नसल्याने या सर्व घटकांचे सुयोग्य प्रमाण रोजच्या आहारात विविध पदार्थ समाविष्ट करुन साधले पाहिजे.
पोटभर जेवणे म्हणजे पोषण होणे असा अर्थ नसून क्षार, जीवनसत्व इत्यादींसारखे पोषक घटक मिळणे देखील तेवढेच महत्वाचे आहे. जेवणामध्ये त्या त्या भागात पिकवली जाणारी स्थानिक अन्नधान्ये, फळे आणि भाज्यांचा समावेश करणे अतिशय महत्त्वाचे आहे. बालकांचे पोषण चांगल्या प्रकारे होण्यासाठी त्यांच्या मातांनाही योग्य प्रकारचा आहार मिळणे आवश्यक आहे. बालकाची वाढ आणि विकास सर्वसामान्य तऱ्हेने होण्यासाठी सुयोग्य पोषण आवश्यक असते.