प्रत्यक्ष कुटुंबापर्यंत माहिती पोहचविण्यासाठी गृहभेट हे एक प्रभावी माध्यम आहे. परंतु अंगणवाडी कार्यकर्ती व आशा ताईंच्या मार्फत होणारी गृहभेट ही सुरुवातीला एकतर्फी असायची. त्या स्वत:जवळ असलेली माहिती मातांपर्यंत पोहचवायची हा एवढाच उद्देश ठेवून मातांपर्यंत पोहचत होत्या. त्यांची स्थिर अशी पद्धत नव्हती. आरंभ उपक्रमांतर्गत गृहभेट या माध्यमाचा प्रभावीपणे वापर करता येईल या दृष्टिकोनातून विचार करुन त्याप्रमाणे गृहभेटीची नव्याने मांडणी करण्यात आली. आता आरंभ प्रकल्पांतर्गत अंगणवाडी व आशा कार्यकर्ती ह्या दोघी मिळून अगोदर गृहभेटीचे पूर्वनियोजन करतात. त्यात बालकांच्या नावाची यादी, वयानुसार खेळासाठी साहित्य, माता व बाल संगोपण पत्रिका, खेळ व संवाद कृतिसूची या सर्वांचा त्यात समावेश असतो. गृहभेट देत असलेल्या कुटुंबाला गृहभेटीला येत असल्याची पूर्वकल्पना देऊन त्यांचा वेळ घेतल्या जातो. माहिती सांगताना कुटुंबामध्ये उपस्थित असलेल्या सगळ्या सदस्यांना सहभागी केल्या जाते. अगोदर त्यांच्याकडून बालक करीत असलेल्या कृतीची माहिती जाणून घेऊन कुटुंबातील सदस्यांना बालकासोबत वयोगटानुसार घरगुती साहित्याचा उपयोग करून खेळाच्या कृतीचे प्रात्यक्षिक करून घेऊन त्या कृतीतून बालकाचा सर्वांगीण विकास कसा होतो, हे खेळ संवाद कृतिसूची, माता व बाल संरक्षण पत्रिकेमधून समजावून सांगतात. तसेच गरजेनुसार आवश्यक व नवीन माहिती दिल्या जाते. त्यांच्यातील होणारा संवाद हा दुतर्फी आणि चर्चेच्या स्वरूपात असतो.